January 12, 2018

WACHEZAJI WA GHARAMA KUBWA ZADI DUNIANI 2018 WAMETAJWA


Cristiano Ronaldo amefunga mabao 58 miaka miwili iliyopita na kuwasaidia Real Madrid kushinda Kombe la Ligi ya Klabu Bingwa Ulaya mara mbili mtawalia na pia La Liga mara moja.
Miaka hiyo miwili iliyopita, ameshinda tuzo ya mchezaji bora duniani, tuzo ya Ballon D’Or, mtawalia.
Anafaa basi kuwa mchezaji bora zaidi duniani na thamani yake kuwa ya juu zaidi?
Ni kweli uchezaji wake hauna kifani. Lakini kwa thamani, la hasha.
Utafiti huo wa shirika la takwimu za michezo la CIES
Kwa mujibu wa ripoti ya shirika la takwimu za michezo la CIES iliyotolewa Jumatano, mchezaji huyo ni wa 49 kwa thamani duniani.
Anayeongoza orodha hiyo ni mshambuliaji wa Paris St-Germain ya Ufaransa, Mbrazil Neymar, 25, ambaye ndiye mchezaji aliyenunuliwa pesa nyingi zaidi na klabu yoyote duniani na mwenzake wa Barcelona Lionel Messi, 30, kutoka Argentina.
Mshambuliaji wa Tottenham Harry Kane ameorodheshwa kuwa wa tatu.
Unaweza kushangaa ni kwa nini thamani ya Ronaldo imekadiriwa kuwa $96,6 milioni.
Utafiti wa mwaka jana wa CIES ambao matokeo yake yalitangaza Januari 2017, alishikilia nafasi ya 7.
Mchezaji Taifa Umri Klabu Thamani (Dola Milioni za Marekani)
1 Neymar Brazil 25 PSG 255.8
2 Lionel Messi Argentina 30 Barcelona 242.8
3 Harry Kane England 24 Tottenham Hotspur 233.8
4 Kylian Mbappé Ufaransa 19 PSG 231.2
5 Paulo Dybala Argentina 24 Juventus 209.7
6 Delle Alli England 21 Tottenham Hotspur 205.7
7 Kevin de Bruyne Ubelgiji 26 Chelsea 201.5
8 Romelu Lukaku Ubelgiji 24 Manchester United 197.9
9 Antoine Griezmann Ufaransa 26 Atletico Madrid 180.4
10 Paul Pogba Ufaransa 24 Manchester United 177.1
49 Cristiano Ronaldo Ureno 32 Real Madrid 96.5
Lakini tutajaribu kufafanua ni kwa nini watafiti wa CIES walifikia uamuzi huo ambao kwa wengi unaonekana wa kushangaza.
Ronaldo si kinda tena
Tathmini ya thamani ya mchezaji sokoni huzingatia mambo mengi. Moja muhimu ni umri.
Ronaldo anakaribia kugonga miaka 33.
Ronaldo si mzee wa kustaafu lakini anafikia ukingoni wa maisha yake ya uchezaji.
Kwa mujibu wa Chama cha Wachezaji wa Soka ya Kulipwa England kwa mfano, umri wa kawaida wa wachezaji kustaafu huwa miaka 35.
Wachezaji walio na umri wa juu kimsingi huumia zaidi, na wanapoumia, huchukua muda mrefu kupona.
Hili ni jambo ambalo klabu huzingatia zinapomnunua mchezaji.
“Sijaelewa ni kwa nini watu wengi hivi wameshangaa,” anasema Dkt Raffaele Polli, mmoja wa watafiti wanaoongoza katika CIES ameambia BBC.
“Ronaldo ni jina kubwa katika soka na mchezaji mzuri sana, lakini anakaribia kutimiza miaka 33 na miezi ya karibuni kiwango chake cha soka kimeanza kushuka. Wachezaji wachanga mara nyingi thamani yao huwa juu.
“Kusema kweli, thamani yake kwa mchezaji wa umri wake ni ya juu.”
Kuna uwezekano mdogo sana kwamba Paris Saint-Germain wangetoat $263m kumnunua Neymar Agosti iwapo mchezaji huyo angekuwa na umri zaidi ya umri wake wa sasa, miaka 25.
Kwa kweli, ni wachezaji wanne pekee wa zaidi ya miaka 29 ambao wamo orodha hiyo ya 100 bora, na Ronaldo ndiye ana umri wa juu zaidi.
Wengine ni Messi, Luís Suarez (Barcelona) na Gonzalo Higuaín (Juventus).

Kasi ya mchezaji kufunga mabao

Lionel Messi ana miaka 30 na ndiye wa pili kwa thamani, thamani yake ikiwa $242.8m?
Mbona? Moja ya sababu za mchezaji huyo wa Argentina kuwa na thamani ya juu ni kutoshuka kwa kiwango chake, na mwendelezo wa kasi ya ufungaji mabao.
Messi amefunga mabao kumshinda Ronaldo msimu huu (20 na Ronaldo 16), pamoja na kusaidia ufungaji wa mabao mengi (tisa dhidi ya matatu).
Aidha, kinyume na mwenzake wa Ureno, ligini ufungaji wake haukushuka ukilinganisha na msimu uliotangulia.
Ronaldo aliyetikisa wavu mara 25 La Liga 2016/17 msimu huu amefunga mara nne pekee.
Messi anakaribia kufunga bao lake la 20.

Kujifunga kwenye klabu

Jambo jingine linalozingatiwa ukikadiria thamani ni jinsi mchezaji amejifunga kwa klabu ya sasa.
Hakuna wachezaji wengi ambao wamekaa klabu moja kama Ronaldi.
Alihamia Real Madrid kutoka Manchester United mwaka 2009.
Licha ya uvumi mara kwa mara kwamba anaweza kuhamia England au Ufaransa, amesalia Real Madrid.
Hii imeathiri thamani yake sokoni.
Sababu ni rahisi – kupanda sasa kwa bei ya wachezaji. Mwaka 2009, uhamisho wake ulikuwa wa juu zaidi duniani alipohamia Real. Kwa sasa, bei yake ni ya sita katika orodha ya wachezaji walionunuliwa ghali zaidi.
“Si kwamba Ronaldo amepoteza thamani katika klabu yake, lakini hali kwamba hajahama kwa miaka 10 ina maana kwamba bei yake kwa viwango vya sasa haijulikani,” anasema Poli.
Hilo linasaidia kueleza ni kwa nini Gonzalo Higuaín anamshinda Ronaldo (19 akiwa na thamani ya $135,7 milioni), kwani alinunuliwa na Juventus kutoka Napoli mwaka 2016 kwa zaidi ya $108.1m.

Matokeo ya timu

Ni Mei tu ambapo Real Madrid walishinda La Liga na Kombe la Ligi ya Klabu Bingwa Ulaya kwa pamoja, na kuwa klabu ya kwanza kutetea ubingwa Ulaya katika robo karne.
Ligi ya Klabu Bingwa Ulaya kwa sasa, Real walifika hatua ya muondoano kwa urahisi, licha ya kupitwa na Tottenham Hotspur kwenye kundi – na walishinda mechi nyingi Ulaya hatua ya makundi msimu uliopita.
Haki miliki ya picha Getty Images
Image caption Ronaldo na Real Madrid hawajafana msimu huu La Liga
Real Madrid hata hivyo msimu huu wametatizika La Liga.
Baada ya mechi 18 wamo nafasi ya 4, alama 16 nyuma ya viongozi Barcelona.
“Uchezaji wa klabu pia huchangia thamani ya mchezaji. Msimu huu Real Madrid wamekuwa wanapata kwa wastani chini ya alama mbili kwa mechi La Liga (1.77) ukilinganisha na 2.05 hatua sawa msimu uliopita,” anasema mtafiti huyo.
Lakini, hata hivyo, hilo halina maana kwamba klabu zinaweza kutarajia kumnunua Ronaldo kwa bei ya kutupa.
Mreno huyo alilipwa mshahara wa $58m mwaka jana.
Na bado amesalia na miaka mitatu mkataba wake Real Madrid.
Wengine walio na thamani ya juu
Kiungo wa Manchester City Kevin de Bruyne, 26, fowadi wa Manchester United Romelu Lukaku na kiungo wa kati Paul Pogba, wote wa miaka 24, ndio wachezaji wengine wanaocheza England walio kwenye 10 bora.
Mshambuliaji wa Real Madrid Cristiano Ronaldo, 32, aliyetawazwa mchezaji bora zaidi wa kiume duniani na Fifa 2017 yumo nafasi ya 49 kwenye orodha hiyo.
Thamani yake ni euro 80.4m (£71.29m)
Mchezaji mpya wa Barcelona Philippe Coutinho, 25, amewekwa nafasi ya 16 ,thamani yake ikikadiriwa kuwa £33m chini ya bei ambayo Barca walilipa Liverpool kumchukua.
Kipa wa thamani ya juu zaidi ni Marc-Andre ter Stegen, 25, wa Barcelona ambaye thamani yake ni euro 96m (£85.13m) na Samuel Umtiti, 24, ndiye beki ghali zaidi, thamani yake ikiwa euro 101m (£89.56m).
Paulo Dybala, 24, wa Juventus ndiye wa thamani ya juu zaidi Serie A thamani yake ikiwa £155.18m naye Robert Lewandowski, 29, wa Bayern Munich anaongoza kwa wachezaji wa Bundesliga (£94.88m).
Wachezaji wengine wa Ligi ya Premia walio kwenye 30 bora
11. Leroy Sane (Man City ) -140.6m 20. Alvaro Morata (Chelsea) -108m
12. Mohammed Salah (Liverpool) -140.5m 23. Roberto Firmino (Liverpool)102.9m
13. Raheem Sterling (Man City) -138.2m 27. Bernardo Silva (Man City) -98.8m
15. Marcus Rashford (Man Utd) -126.8m 28. Sergio Aguero (Man City) -98.7m
17. Gabriel Jesus (Man City) -122.6m 29. Christian Eriksen (Tottenham) -98.4m
18. Eden Hazard (Chelsea) -119.6m 30. Alexandre Lacazette (Arsenal) -97.6m

Chanzo:bbcswahili

0 comments:

Post a Comment

AHSANTE KWA KUENDELEA KUPATA HUDUMA ZETU PIA KUJITANGAZA NASI IWAPO UNAHABARI AMA TANGAZO WASILIANA NASI 0754 026299 Email . fgodwin94@gmail.com , ANGALIZO KUMBUKA KILA MMOJA ANA MTAZAMO WAKE HIVYO TUMIA LUGHA NZURI KATIKA KUTOA MAONI YAKO IWAPO UTASHINDWA BASI NI HERI USITOE MAONI SI LAZIMA ILI KUEPUSHA MAKWAZO KWA MWINGINE