December 22, 2017

WAZIRI LUKUVI AZIDI KUWA MTETEZI WA WANYONGE BAADA YA DODOMA SASA AWAKOMBOA VINGUNGUTI TOKA MIKONONI MWA KAMPUNI YA PMM...

         

JITIHADA  za utendaji kazi  za waziri wa Ardhi, Nyumba na Maendeleo ya Makazi  Mhe. William Lukuvi kupitia  wizara yake zimeendelea  kuwa ukombozi kwa wananchi wanyonge kwani baada ya waziri kutoka Dodoma  kumaliza mgogoro uliodumu kwa  zaidi ya miaka 10 kwa  kupokonya ardhi iliyowekezwa  bila utaratibu toka kwa mwekezaji  sasa waziri Lukuvi amefanikiwa kutatua mgogoro wa zaidi ya miaka mitano ulikuwa ukiwatesa wananchi wa mtaa wa Vingunguti jijini Dar es Salaam baada  Mwekezaji wa Kampuni ya PMM kutaka kujimilikisha ardhi na nyumba za wananchi  bila utaratibu .
 
Akizungumza na wakazi  wa Vingunguti leo katika mkutano  uliotishwa  na Waziri huyo kutaka kujua  hatma ya nyumba za wakazi na maeneo  hayo wanayoishi, na Waziri Lukuvi amesitisha shughuli ya utathmini na ununuzi  wa nyumba zaidi ya elfu 4 na kumtaka mwekezaji  huyo kuwalipa wakazi hao hasara aliyoisababisha tangu mwaka 2012.
 
“Nimepata malalamiko yenu kutoka  kwa Mbunge wenu baada ya kunifahamisha  kuhusu mgogoro huu na nimesikitishwa  na dhuluma iliyokuwa inaendelea  pamoja na uendeshaji wa hovyo hovyo wa huyu anayejiita  mwekezaji, hawezi kuja mtu kienyeji akawaondoa watu elfu 70 bila ya utaratibu wa kisheria na kuwaeleza  kuwa ameshaongea na  Wizara ya Ardhi jambo ambalo sio la kweli na kuanza  kuwanyanyasa kwa kuwa kuwakataza baadhi yenu kutoendelea na ujenzi au ukarabati wa nyumba zenu wala kupangisha” alisema Waziri Lukuvi.
 
Aidha Waziri Lukuvi alisema kuwa Serikali haiutambui kabisa mradi huo kwa sababu mambo yalifanyika kienyeji, na kuongeza kuwa serikali haikatazi mtu yeyote kuuza eneo au nyumba yake ili mradi huyo muuzaji  ahakikishe analipa kodi ya asilimia 7 ya mapato ya nyumba aliyoiuza, na kuongeza kuwa serikali ya awamu ya tano inayoongozwa na Rais John Magufuli haitokubali kuona mwananchi ananyanyasika dhuluma yoyote ile.
 
Awali Meneja wa  Kampuni ya PMM, Bw. Deogratus Chacha amekiri kuwa wamekuwa katika  mazungumzo  na wakazi wa maeneo hayo tangu mwaka 2012 kueleza kuwa mpaka kufikia mwakani  mwezi wa sita watakuwa  wameshakamilisha ulipaji wa fedha zote kwa wakazi ambao bado hawakupata fidia zao.
 
Kwa upande wake Mkuu wa Wilaya ya Ilala, Mhe. Sophia Mjema alimshukuru Waziri Lukuvi kwa kuweza kuwasaidia wakazi wa maeneo hayo kwa kuweza kuwatatulia mgogoro huo kwani walikuwa hawajui hatma yao ya kuishi  maeneo  hayo.
 
Naye Mbunge  wa Jimbo la Segerea Mhe. Bonnah Kaluwa alisema kuwa Kampuni hiyo  ya  PMM ilianza mchakato wa kuanza  kuwalipa  wananchi mwaka 2012 na wananchi wengine wameshahama maeneo  yao na wengine kushindwa kufanya maendeleo  yao na wengine walikuwa wakimfata hadi ofisini kwake kutaka awasaidia na kushukuru sana  Serikali ya awamu hii kuwa sikivu na kuweza  kuwatatulia mgogoro huo kwani walikuwa hawajui hatma  yao  itakuwaje.
 
Utendaji  kazi  wa  Waziri Lukuvi umeendelea  kupongezwa kila kona  ya nchi  huku  wengi  wakionyesha  kumkubali  zaidi na  kutaka mawaziri wengine  kuiga mfano huo katika  kumsaidia Rais Dkt John Magufuli  kuwatumikia  watanzania .

0 comments:

Post a Comment

AHSANTE KWA KUENDELEA KUPATA HUDUMA ZETU PIA KUJITANGAZA NASI IWAPO UNAHABARI AMA TANGAZO WASILIANA NASI 0754 026299 Email . fgodwin94@gmail.com , ANGALIZO KUMBUKA KILA MMOJA ANA MTAZAMO WAKE HIVYO TUMIA LUGHA NZURI KATIKA KUTOA MAONI YAKO IWAPO UTASHINDWA BASI NI HERI USITOE MAONI SI LAZIMA ILI KUEPUSHA MAKWAZO KWA MWINGINE