Matukio Daima

Tembelea kila siku kwa habari na matukio mbali mbali..

Matukio Daima

Kwa Habari za Kitaifa.

Matukio Daima

Kwa Habari za Kimataifa.

Matukio Daima

Kwa Habari za Uchumi na Biashara.

Matukio Daima

Kwa Habari za Michezo na Burudani.

DOWNLOAD MATUKIO DAIMA APP HAPA

https://play.google.com/store/apps/details?id=com.matukiodaima

November 24, 2017

SAMIA KUZINDUA SIKU 16 ZA KUPINGA UKATILI


NO EXCUSE 4
Kaimu mkurugenzi wa shirika la wanawake katika Sheria  na Maendeleo Afrika (WiLDAF),Anna Kulaya,akiongea wakati wa mkutano na waandishi wa habari jijini Dar es Salaam kuhusu kampeni hizo
No EXCUSE 1
Afisa Mawasiliano kutoka TBL,Amanda Walter akiongea wakati wa mkutano wa  waandishi wa habari kihusu kampeni hizo
NO EXCUSE 6
Baadhi ya wadau wa Masuala ya kupambana  na vitendo dhidi ya ukatili katika picha wakati wa mkutano huo uliofanyika jijini Dar es Salaam
NO EXCUSE 7
Baadhi ya wadau wa masuala ya kupambana na vitendo dhidi ya ukatili wa kijinsia katika picha ya pamoja baada ya kufanya mkutano wa waandishi wa habari
……………………………………………………………………….
Kampeni  ya siku 16 ya kupinga ukatili wa kijinsia inayoshirikisha wadau mbalimbali wanaopinga  vitendo hivyo inazinduliwa  nchini kesho jijini Dar es Salaam ambapo Makamu wa Rais,Mh.Samia Suluhu Hassan, anatarajia kupokea maandamano ya wadau hao ambayo yataanzia katika viwanja vya shule ya msingi ya Muhimbili na kuishia katika viwanja vya leaders.
Kampeni hizo ambazo hufanyika duniani kote kwa hapa nchini zinaratibiwa na Shirika lisilo la kiserikali la wanawake katika sheria na Maendeleo Afrika (WiLDAF) kwa kushirikiana na Mtandao wa Kupambana na Ukatili wa Kijinsia (MKUKI) ,Wadau wa Maendeleo na Asasi za Kiraia
Mwaka huu kampuni ya Tanzania Breweries Limited,TBL chini ya kampuni mama ya ABINBEV imejitosa katika kampeni hizo ambazo itasambaza jumbe mbalimbali za kuelimisha jamii kupitia kampeni yake ya #NO EXCUSE!!! ACHA SABABU, BADILIKA inayoenda sambamba na kampeni yake ya kuelimisha jamii juu ya Unywaji wa kistaarabu.

MKURUGENZI IDARA YA USHIRIKIANO WA KIMATAIFA YAKUTANA NA MSAJILI WA UN-MICT

Mkurugenzi wa Idara ya Ushirikiano wa Kimataifa katika Wizara ya Mambo ya Nje na Ushirikiano wa Afrika Mashariki, Balozi Celestine Mushy akizungumza na Msajili wa Mfumo wa Kimataifa wa kumalizia mashauri masalia ya iliyokuwa Mahakama ya Kimataifa ya Jinai ya Rwanda (MICT), Dkt. Olufemi Elias alipotembelea katika ofisi za Wizara Jijini Dar es Salaam tarehe 24 Novemba 2017.

Kutoka kushoto ni Kaimu Mkurugenzi wa Kitengo cha Sheria katika Wizara ya Mambo ya Nje na Ushirikiano wa Afrika Mashariki, Bi. Caroline Chipeta na Maafisa mambo ya nje wakifuatilia mazungumzo.

Maafisa walioambatana na Msajili wa UN-MICT wakifuatilia mazungumzo.

SERIKALI INACHUNGUZA KIFO CHA MTOTO ALIYEFARIKI KWA KUPIGWA NA SILAHA INAYODAIWA NI GOBORE HUKO LUKENGE

IMG_20171123_112908
MKUU wa wilaya ya Kibaha,Assumpter Mshama akizungumza kwenye mkutano maalumu wa kijijini cha Lukenge,kata ya Magindu,wilayani hapo.
Picha na Mwamvua Mwinyi
……………
Na Mwamvua Mwinyi,Kibaha 
SERIKALI inaendelea kuchunguza tukio la mtoto ambae anadaiwa kuuwawa kwa kupigwa na gobore na baba yake mdogo Ally Sakalawe (43) wakati akijibizana na makachero wa polisi walipokwenda kufanya upekuzi wa silaha zinazomilikiwa kinyume na sheria,kijiji cha Lukenge kata ya Magindu ,Kibaha.
Wakati serikali ikiendelea na uchunguzi huo ,wakazi wa kijiji hicho wametakiwa kuendelea na shughuli zao na kuishi kwa amani .
Akizungumza kwenye mkutano mkuu maalumu wa kijijini hapo, mkuu wa wilaya ya Kibaha, Assumpter Mshama alisema serikali itatoa taarifa kamili ili kuondoa utata ambao umegubika tukio hilo kwa baadhi ya familia na wakazi wa kijiji hicho kudai kuwa polisi ndiyo walimwua mtoto huyo aitwaye Mark Joel Modest (15).

Alieleza anajua kuwa tukio hilo limeumiza familia na wakazi lakini wawe na subira kupisha uchunguzi .
“Nawaomba muishi kwa amani na msiwe na wasiwasi serikali inaendelea na uchunguzi na mtapewa majibu utakapokamilika “;:
“Watu wanaosema kuwa hawaishi majumbani kuhofia kukamatwa wasiogope kama wanajijua sio wahalifu hawana haja ya kuogopa,” alisema Assumpter.
Alieleza vyombo vyote vya ulinzi na usalama vinafanya kazi zake na haki itatolewa kwani jambo hili linasikitisha kwakuwa mtoto kapoteza uhai na alikuwa hausiki kwa lolote.
Aidha aliwataka wananchi hao kuwa wawe makini katika kumiliki silaha ambapo mtuhumiwa licha ya kutokea kwa tukio hilo la mauaji pia alibainika kuwa alikuwa akimiliki gobore kinyume na taratibu.
Pamoja na hayo alikutwa na vitu mbalimbali ambavyo vinaleta maswali mengi juu ya matumizi ya silaha hiyo.

“Lazima tujiulize licha ya kifo cha mtoto huyo lakini mtuhumiwa ambaye anashikiliwa na polisi alikutwa na bunduki mbili aina ya gobore, risasi ya mark 4, vipande vya nondo na gololi vyote vikitumika kama risasi hivyo lazima tujiulize matumizi ya silaha hizi,” alifafanua Assumpter.
Awali akielezea juu ya tukio hilo mke wa mtuhumiwa ,Zaina Manoza alisema siku ya tukio hilo walikuwa wamelala ndani majira ya saa 8 kwenda saa 9 usiku askari walifika na kuanza kupiga bunduki na wao kuanza kupiga kelele wakiomba msaada kwa majirani.

Walitakiwa watoke nje na kujitambulisha kwa majina lakini yeye akawaambia katika hao mtoto mmoja hayupo wakamwambia akamwangalie chumba kingine na alipokwenda alimkuta mtoto huyo akiwa anavuja damu ubavuni.

“Baada ya hapo walinitaka nikamwite mwenyekiti wa kitongoji na alipofika wakawaambia wampeleke mtoto akapate tiba na kunitaka niongozane na huyo mtoto na mwanangu mwingine tukiwa tumembeba nikaona kama hali ni mbaya nikajua tayari kafa,” alisema Zaina.

Kamanda wa Polisi wa wilaya ,Caster Ngonyani alisema wananchi wanapaswa kuishi kwa amani na hawatakiwi kuwa na hofu.
Ngonyani alisema kuwa ripoti aliyopewa juu ya tukio hilo ilisema kuwa polisi walikwenda kwenye nyumba hiyo baada ya kupata taarifa kuwa kuna silaha aina ya gobore inayomilikiwa bila ya kibali.
“Taarifa hizo walizipata kutoka kwa wakazi wa kijiji hicho ndipo walipokwenda kwa ajili ya kuzikamata”Na kulikuwa na wamiliki wawili wa hizo silaha ambao ni Ally Sakalawe na Robinus Almas na hawakutoa taarifa kwa uongozi kwa hofu taarifa kuvuja “
“Walipofika waligonga na kushindwa kuingia ndani baada ya mtuhumiwa kukataa kufungua mlango na kuanza kurusha  hewani,” alisema Ngonyani.

Alisema kuwa mwili wa marehemu ulifanyiwa uchunguzi kwenye Hospitali ya Rufaa ya mkoa ya Tumbi mbele ya baba Mzazi Modest na Anna Raphael mama mzazi.

“Kulikutwa kipande cha chuma ambacho ni kipande cha nondo kwenye tumbo la marehemu hali ambayo inaonyesha silaha iliyotumika ni gobore na silaha ya polisi haitumii chuma inatumia risasi na zingekutwa tungejua kuwa polisi walihusika,” alisema Ngonyani.

Kwa mujibu wa ripoti hiyo ni dhahiri kuwa mtoto huyo alipigwa na mtuhumiwa kwani tumboni kulikutwa kipande cha nondo ambazo zimekatwa na hutumika kama risasi kwenye magobore hayo ambapo vipande vingine 10 vilikutwa nyumbani kwa mtuhumiwa.

Tukio hilo lilitokea Oktoba 28 mwaka huu wakati polisi walipokwenda kufanya upekuzi juu ya uwepo wa silaha hizo aina ya magobore ambaye yalikuwa yakitumika kwa uhalifu na uwindaji haramu.
Licha ya mtuhumiwa wa kwanza kukutwa na silaha hizo pia walimkamata Robson Almas naye akiwa na magobore mawili yakiwa hayana vibali vya umiliki.

GARI LA HARUSI LAUA KUMI

Watu 10 wamefariki na wengine 24 kujeruhiwa baada ya gari aina ya Toyota Hiace, kugongana uso kwa uso na gari dogo aina ya Toyota Noah katika eneo la Ihuka wilayani Ikungi Mkoani Singida.
Akithibitisha kutokea kwa tukio hilo Kamanda wa Polisi Mkoa wa Singida, Deborah Magiligimba amesema ajali hiyo imesababishwa na uzembe wa dereva wa gari aina ya Toyota Hice T.581 BBV kulifuata gari aina ya Toyota Noah namba T.423 CFF na kusababisha vifo na majeruhi.

Kamanda Magiligimba amesema kuwa gari moja kati ya hayo lilikua linatokea kumchukua Bibi Harusi wakati gari nyingine ilikua inatokea kwenye msiba ndipo zilipokutana katika eneo hilo na kusababisha ajali ambayo taarifa za awali zinasema imetokana na uzembe wa dereva.
Mganga wa zamu katika Hospitali ya Malkia wa Ulimwengu Puma Singida, John Mmary amethibitisha kupokea Miili ya marehemu hao pamoja na Majeruhi wa ajali hiyo ambao wengi wao walikua katika gari aina ya toyota Hiace na kuongeza kwamba majeruhi kumi na tano waliolazwa katika hopitali hiyo wanaendelea vizuri na matibabu isipokuwa wawili halizao siyo nzuri na wameumia sehemu kubwa za vichwa.
Magari yaliyo gongana aina ya Hice inadaiwa lilikuwa limewabeba maharusi pamoja na ndugu zao huku gari aina ya Noah ilikuwa imewabeba watu walio kuwa wakitokea kwenye msiba.

RAIS MPYA WA ZIMBABWE ABEBA MATUMAINI LUKUKI YA UMMA

Emmerson Mnangagwa mwenye umri wa miaka 75 amekula kiapo ya kuwa rais mpya wa Zimbabwe.
Emmerson Mnangagwa ndiye rais mpya wa Zimbabwe. Mnangagwa ameapishwa muda mchache ambao umepita hivyo amechukua hatamu ya rais kutoka kwa Robert Mugabe aliyejiuzulu baada ya kuitawala nchi hiyo kwa miaka 37.
Emmerson Mnangagwa mwenye umri wa miaka 75 amekula kiapo ya kuwa rais wa Zimbabwe.
Shangwe, muziki, densi na nyimbo za sherehe zimeutawala uwanja huo mjini Harare wakati ya sherehe ya kuapishwa kwa Mnangagwa.
Sherehe hiyo inayoendelea imehudhuriwa na maelfu kwa maelfu ya watu pamoja na viongozi kadhaa, akiwemo kiongozi wa vuguvugu la upinzani la Democratic Change Morgan Tsvangirai.
SADC yaahidi kushirkiana na serikali ya Mnangagwa
Jumuiya ya Maendeleo ya nchi za kusini mwa Afrika SADC imesema iko tayari kushirikiana kwa karibu na kiongozi mpya wa Zimbabwe na serikali yake. Rais wa Afrika Kusini Jacob Zuma hajahudhuria sherehe hizo. Hata hivyo alituma udhuru.
Emmerson Mnangawa na mkewe Auxillia uwanjani Harare Emmerson Mnangawa na mkewe Auxillia uwanjani Harare
Baadhi ya Wazimbabwe, wameelezea furaha yao, na matumaini makubwa waliyo nayo kwa Mnangagwa. Hizi ni baadhi ya kauli za Wazimbabwe ambao wameelezea hisia zao: "Ninayo furaha tele kuwa na rais mpya. Siwezi kukuelezea jinsi nilivyo na furaha. Wow! Inapendeza sana! "Hii ndiyo siku ya furaha zaidi katika maisha yangu na ninataka kuisifia na kuithamini siku hii."
Usalama umeimarishwa vilivyo, huku maafisa wa polisi na jeshi wakishika doria.
Robert Mugabe aliyeitawala nchi hiyo kiimla kwa miaka 37, alijiuzulu mapema wiki hii, baada ya jeshi kuchukua madaraka wiki iliyopita pale alipomfuta kazi makamu wake Mnangagwa.
Mugabe ahakikishiwa usalama
Hapo awali, Mnangagwa alimhakikishia Robert Mugabe mwenye umri wa miaka 93 ulinzi kamili pamoja na familia yake kama raia wa Zimbabwe. Mugabe amepewa kinga ya kutoshitakiwa.
Aidha amempongeza kwa matayarisho ya kuwezesha kuapishwa kwake leo. Hayo yalitangazwa mapema leo na shirika la habari la serikali nchini humo Herald News.
Jeshi likiandaa gwaride la heshima katika sherehe ya kuapishwa kwa Mnangagwa Jeshi likiandaa gwaride la heshima katika sherehe ya kuapishwa kwa Mnangagwa
Mnangagwa aliyerejea Zimbabwe wiki hii baada ya kuondoka alipofutwa kazi na Mugabe, alisema kuwa Zimbabwe inashuhudia demokrasia mpya na kamili. Hata hivyo wakosoaji wanahoji kuwa yeye ni mwanachama wa ZANU-PF mwenye misimamo mikali aliyepata madaraka kupitia mapinduzi mbadala ya kijeshi.
Anafahamika kama "Mamba" kufuatia ukatili wake na anadaiwa kusimamia mauaji yaliyofanywa na wanajeshi miaka ya 1980 na mwaka 2008 wakati wa ghasia za kisiasa wakati Mugabe nusura ashindwe katika uchaguzi wa rais.
Wakati haya yakifanyika, aliyekuwa waziri wa fedha nchini humo, Ignatius Chombo ambaye alikuwa akishikiliwa na jeshi tangu wiki iliyopita jeshi lilipochukua madaraka, amekabidhiwa kwa maafisa wa polisi.
Wakili anayemwakilisha amesema hayo na kuongeza kuwa yupo hospitalini kwa sasa kwa matibabu, japo hakufafanua vipi anaugua. Profesa Lovomore Madhuku amesema Chombo atafikishwa mahakamani na labda akabiliwe na mashtaka ya kutumia vibaya mamlaka ya ofisi yake.
Mwandishi: John Juma/AFPE/DPAE

RAIS WA ZANZIBAR DK SHEIN AZUNGUMZA NA MABALOZI WA NCHI MBILI IKULU ZANZIBAR LEO

DSC_4433
RAIS  wa Zanzibar na Mwenyekiti wa Baraza la Mapinduzi Dk Ali Mohamed Shein, akifuatana na  mgeni  wake Balozi wa Oman Nchini Tanzania Balozi Ali Abdulla  Al- Mahruq, baada ya kumaliza mazungumzo yao yaliofanyika leo Ikulu Zanzibar alipofika kujitambulisha .
DSC_4199
RAIS wa Zanzibar na Mwenyekiti  wa Baraza la Mapinduzi Dk Ali Mohamed Shein, akimsikiliza mgeni wake Balozi wa Indonesia Nchini Tanzania Balozi Rotlan Paradede alipofika Ikulu Zanzibar  kwa mazungumzo leo
DSC_4224
RAIS wa Zanzibar na Mwenyekiti wa Baraza la Mapinduzi Dk. Ali Mohamed Shein, akizungumza na mgeni wake Balozi wa Indonesia Nchini Tanzania Mhe. Rotlan Paradede , alipofika Ikulu Zanzibar kwa mazungumzo leo
DSC_4409
RAIS wa Zanzibar na Mwenyekiti wa Baraza la Mapinduzi Ak. Ali Mohamed Shein, akizungumza na Balozi wa Oman Nchini Tanzania Mhe. Al Abdulla  Al-Mahruq alipofika Ikulu Zanzibar kujitambulisha leo
DSC_4419
RAIS wa Zanzibar na Mwenyekiti wa Baraza la Mapinduzi Ak. Ali Mohamed Shein, akizungumza na Balozi wa Oman Nchini Tanzania Mhe. Al Abdulla  Al-Mahruq alipofika Ikulu Zanzibar kujitambulisha  akiwa na Balozi Mdogo wa Oman Zanzibar Mhe.Ahmed Humuod Al -Habs  leo 24/11/2017.
Picha na Ikulu

KAIRUKI AFANYA MAZUNGUMZO NA BALOZI WA KUWAIT NCHINI LEO

 Waziri wa Madini, Angellah Kairuki (kulia) akiwa na Balozi wa Kuwait hapa nchini Jasem Al-Najem (kushoto),  katika ofisi za Wizara ya Madini jijini Dar es Salaam.
 Waziri wa Madini, Angellah Kairuki (kushoto) akipokea zawadi ya Ngao kutoka kwa Balozi wa Kuwait hapa nchini Jasem Al-Najem (kulia),  katika ofisi za Wizara ya Madini jijini Dar es Salaam. 
Balozi wa Kuwait hapa nchini Jasem Al-Najem (kulia) akimweleza Waziri wa Madini, Angellah Kairuki (kushoto) kuhusu alama mbalimbali zilizo katika Ngao kutoka nchini Kuwait, mara alipomtembelea katika ofisi za Wizara ya Madini jijini Dar es Salaam.
…………..
Waziri wa Madini, Angellah Kairuki amekutana na kufanya mazungumzo na Balozi wa Kuwait hapa nchini, Jasem Al Najem tarehe 24 Novemba, 2017.
Kikao hicho kimefanyika katika Ofisi za Wizara ya Madini jijini Dar es Salaam ambapo wamezungumza masula mbalimbali kuhusu uendelezaji wa Sekta ya Madini nchini.
Waziri Kairuki amesema kuwa mazungumzo yake na Balozi wa Kuwait yamelenga katika suala la uwekezaji kwenye Sekta ya Madini ambapo ameikaribisha nchi hiyo kuja kuwekeza nchini ili kuendeleza Sekta husika.
Aidha, ameongeza kuwa, katika kikao hicho wamezungumzia suala la kuwajengea uwezo Wataalam wa Madini nchini ili waweze kufanya kazi zao kwa ufanisi.
Vilevile wamejadiliana suala la kubadilisha uzoefu kati ya Kuwait na Tanzania lengo likiwa ni kuhakikisha kuwa Sekta ya Madini inachangia ipasavyo katika uchumi wa nchi husika.

SERIKALI YAAGIZA UPATIKANAJI WA MAJI KWENYE HALMASHAURI KUFIKIA ASILIMIA 75 MWAKANI

1
Waziri wa Maji na Umwagiliaji Mhandisi. Isack Kamwelwe akihutubia washiriki wa mkutano katika Ukumbi wa Tanga Beach Resort.
2
Katibu Mkuu Wizara ya Maji na Umwagiliaji, Profesa Kitila Mkumbo wakati alipokuwa akitoa neno.
3
Mwenyekiti wa ATAWAS, Mhandisi Mkama Bwire wakati alipokuwa akitoa maelezo.
4
Picha ya pamoja ya washiriki wa mkutano na Waziri wa Maji na Umwagiliaji, Mhandisi Isack Kamwelwe.
……………..
Waziri wa Maji na Umwagiliaji, Mhandisi Isack Kamwelwe amezitaka Halmashauri zote nchini kuhakikisha zinafikisha huduma ya maji kwenye maeneo yao kwa wastani wa asilimia 75 hadi kufikia mwakani.
Akihutubia wadau wa Sekta ya Maji jijini hapa wakati wa ufunguzi wa Mkutano wa Wadau wa Usambazaji Maji nchini, Mhandisi Kamwelwe alisema Halmashauri zinatakiwa kufikia asilimia hizo, ili kutekeleza Ilani ya chama tawala ya kuwapatia wakazi wa mijini wastani wa asilimia 95 na vijijini asilimia 85 ifikapo 2020.
“Nitumie fursa hii kuziagiza Halmashauri zote nchini kuhakikisha zinafikisha asilimia 75 mwakani, na zile Halmashauri ambazo wanahisi hawatafika waje tuzungumze tuone namna gani ya kuweza kufika hapo” aliagiza Waziri Kamwelwe.
Mkutano wa wadau wa usambazaji maji hufanyika kila mwaka kwa lengo la kubadilishana uzoefu miongoni mwa wadau wa sekta hiyo, ambapo mada mbali mbali hutolewa na wataalamu kutoka ndani na nje ya nchi, na kwa mwaka huu jumla ya mada 20 zitatolewa kwa washiriki wa mkutano huo.
Kwa upande wake Katibu Mkuu wa Wizara ya Maji na Umwagiliaji, Prof. Kitila Mkumbo, amewashukuru Jumuiya ya Wasambazaji Maji (ATAWAS) kwa jitihada zao za dhati za kuhakikisha Sekta ya Maji inapiga hatua kimaendeleo.
Pia, amewahakikishia kuwa wizara itatoa ushirikiano wa kutosha, kuhakikisha lengo la kuwapatia wananchi wa Tanzania huduma bora na endelevu ya majisafi na usafi wa mazingira linafikiwa. “Wizara yote leo ipo hapa, Waziri na Katibu Mkuu wote tupo, sasa ni nguvu gani mnayoitaka tena? Tuwahakikishie kuwa tupo pamoja na nyie ili kutimiza lengo la Serikali yetu,’’ alisema Prof. Mkumbo.
Mkutano wa mwaka wa ATAWAS umeanza tarehe 23 na kukamilika tarehe 25 mwezi Novemba na hufanyika kila mwaka kwa lengo la kubadilishana uzoefu na utaalamu katika Sekta ya Maji.

MAHAKAMA YA AFRIKA KUSINI YAMUONGEZEA KIFUNGO CHA MIAKA 13 MWANARIADHA PISTORIUS KWA KUMUUA MPENZI WAKE


Mahakama ya rufaa nchini Afrika Kusini imemuongezea adhabu ya kifungo mwanariadha mwenye ulemavu Oscar Pistorius kutoka miaka 6 hadi miaka 13 na miezi mitano kwa kosa la kumuua mpenzi wake Reeva Steenkamp.
Hatua hii inafuatia madai kutoka upande wa serikali kwamba adhabu aliyopewa awali ya miaka sita ilikuwa ndogo. Pistorius alishtakiwa kumuua mpenzi wake kwa kumpiga risasi 4, katika siku ya wapendanao mwaka 2013, na baadaye Pistorious alisema alifyatua risasi hizo kwa kujua ni mwizi.
Familia ya Reeva Steenkamp imeeleza kuwa wamefurahishwa na uamuzi wa mahakama na inaonesha kuwa haki inaweza kuendelea kutendeka nchini humo Afrika Kusini.

WAZIRI MKUU AMPA OFISA ARDHI MWEZI MMOJA KUFIDIA WANANCHI

unnamed
WAZIRI MKUU Kassim Majaliwa amempa mwezi mmoja Ofisa Ardhi wa wilaya ya Namtumbo Bw. Maurus Yera awe ametafuta ardhi ya kuwafidia wakazi wa kijiji cha Lwinga wilayani Namtumbo.
Wakazi hao 21 mwaka 2008 eneo lao lenye ukubwa wa ekari 101 lilitwaliwa na Serikali kupitia halmashauri ya wilaya hiyo kwa ajili ya kupisha ujenzi wa shule ya sekondari ya mkoa wa Ruvuma na waliahidiwa kulipwa fidia.
Waziri Mkuu alitoa agizo hilo jana jioni (Alhamisi, Novemba 23, 2017) alipozungumza na wananchi katika mkutano wa hadhara uliofanyika kwenye uwanja wa michezo wa Lwinga akiwa katika ziara yake ya kikazi mkoani Ruvuma.
Alitoa agizo hilo baada ya kupokea malalamiko kutoka kwa wananchi hao kupitia mabango, ambapo walimuomba awatatulie kero hiyo ya madai ya fidia ya ardhi iliyodumu kwa miaka 10 bila kupatiwa ufumbuzi.
Waziri Mkuu alisema haoni sababu ya Halmashauri hiyo kushindwa kuwafidia wananchi hao sehemu ya ardhi kwa muda wote huo ukizingatia wilaya hiyo ina hifadhi ya ardhi.
“Nataka wananchi hawa wawe wamelipwa fidia yao ya ardhi kabla ya siku kuu ya Krismasi ya mwaka huu. Serikali haiko tayari kuona wananchi wake waliotoa ardhi kupisha maendeleo wakisumbuliwa.”
Waziri Mkuu alisema Serikali ya awamu ya Tano chini ya Rais Dkt. John Magufuli inataka kila mtumishi ahakikishe anatumia taaluma yake vizuri kwa kuwahudumia wananchi ikiwa ni pamoja na kutatua kero zinazowakabili kwa wakati.
Pia Waziri Mkuu alitoa wito kwa wananchi hao kuhakikisha hawakubali kutoa rushwa pale wanapohitaji kupata huduma mbalimbali kutoka kwa watumishi kwa kuwa ni haki yao kuhudumiwa.
Aliwataka wananchi kuwa na imani na Serikali yao na kuiunga mkono katika mapambano dhidi ya rushwa kwani vitendo hivyo vinakwamisha shughuli za maendeleo ya wananchi na Taifa kwa ujumla.
Katika hatua nyingine, Waziri Mkuu amewataka watendaji kuhakikisha miradi wanayosimamia inakuwa na thamani inayolingana na kiasi cha fedha kilichotolewa na iwapo watabainika kwenda kinyume hatua kali zitachukuliwa dhidi yao.
“Lazima kiasi cha fedha kinachotolewa kugharamia mradhi kilingane na thamani ya mradi husika. Mfano tumetoa sh. milioni 70 kugharamia mradi na kukuta mradi uliojendwa ni wa sh. milioni 30 aliyeshughulikia ujenzi huo nasi tutamshughulikia hatutamuacha salama.”
Awali, Waziri Mkuu alifungua ghala la kuhifadhiia mpunga na mchele katika wilaya ya Namtumbo lililojengwa na MIVARF na kisha alizungumza na watumishi wa halmashauri hiyo na kuwataka wafanye kazi kwa bidii na kuzingatia maadili ya utumishi wa umma.
Kwa upande wake Mkuu wa Mkoa wa Ruvuma Bibi Christine Mndeme alisema mkoa huo unakabiliwa na changamoto mbalimbali ikiwemo ya ukosefu wa masoko kwa mazao ya mahindi na mbaazi, ambapo Waziri Waziri Mkuu alisema sula hilo linashughulikiwa hivyo wananchi waendelee kuwa na subira.

IMETOLEWA NA:
OFISI YA WAZIRI MKUU, 
iJUMAA, NOVEMBA 24, 2017.

KONGAMANO LA WASOMI WANATAALUMA KUFANYIKA KESHO HOTELI YA LANDMARK UBUNGO JIJINI DAR ES SALAAM


Mratibu wa Kongamamo la Wasomi Wanataaluma wa Kikristo liitwalo Tanzania for Jesus Prayer Movement ambalo mlezi wake ni Huduma ya I Go Africa for Jesus,  Ephrahim Mwambapa akizungumza katika mkutano na waandishi wa habari uliofanyika Kanisa la Abundant Bressing Center (ABC), Tabata Matumbi jijini Dar es Salaam, kuhusu kongamano hilo litakalofanyika Hoteli ya Landmark siku ya Jumamosi. Kulia ni Katibu Mkuu  wa Kongamano hilo, Lendian Bigoli.
 
Mratibu wa Kongamano hilo, Ephrahim Mwambapa akisisitiza jambo kwenye mkutano huo. Kushoto ni Kiongzi Mkuu wa Kanisa la Abundant Bressing Center nchini, Askofu Flaston Ndabila.
 
Na Dotto Mwaibale
 
WANAFUNZI waliohitimu vyuo vikuu mbalimbali hapa nchini kesho wanatarajia kufanya kongamono kubwa la kihistoria kujadili namna watakavyoweza kutumia taaluma zao kusaidia jamii, kanisa na taifa kwa ujumla.
 
Akizungumza na waandishi wa habari jijini Dar es Salaam Mratibu wa Kongamamo hilo, Ephrahim Mwambapa alisema kongamanao hilo linaundwa na muungano wa wasomi wa kristo uitwao Tanzania for Jesus Prayer Movement ambao mlezi wake ni Huduma ya I Go Africa for Jesus.
 
Alisema licha ya muungano huo kuundwa na vijana wa kikristo lakini vijana wote wasomi kutoka katika vyuo na shule za sekondari na madhehebu mbalimbali wanaalikwa ili kuchangia mada zitakazo jadiliwa na mgeni rasmi atakuwa ni Kiongzi Mkuu wa Kanisa la Abundant Bressing Center nchini, Askofu Flaston Ndabila.
 
Mwambapa alisema kuwa katika kongamano hilo kutakuwepo na mada mbalimbali na kuona ni jinsi gani kila mmoja na taaluma yake ataweza kusaidia jamii badala ya taaluma hiyo kuachwa bila ya kuifanyia kazi.
 
“Tunapokuwa vyuoni tunakuwa na mipango mingi ya maendeleo lakini baada ya kumaliza masomo kila mtu anakuwa kivyake wakati tunapaswa kushirikiana na jamii na ndio maana tumeona ni vizurio kuazisha muungano huu lengo likiwa kujumuika na jamii katika shughuli za maendeleo ya nchi na dini” alisema Mwambapa.
 
Alisema wazo la kuanzisha muungano huo nimatunda ya mkutano ya mkutano mkuu wa kitaifa wa kuliombea taifa ulioratibiwa na Askofu Flaston Ndabila na kuhudhuriwa na watu mbalimbali na vijana kutoka vyuo vikuu uliofanyika Uwanja wa Uhuru jijini Dar es Salaam.
 
Mwambapa alisema kongamano hilo litahudhuriwa na wanafunzi kutoka vyuo mbalimbali,sekondari baadhi wa viongozi.
 


Zimbabwe: Emmerson Mnangagwa kumrithi Mugabe kama rais

    Emmerson Mnangagwa akiwahutubia wafuasi wake mjini Harare, Zimbabwe. tarehe 22 Novemba, 2017                    Emmerson Mnangagwa alirejea kama shujaa Zimbabwe nchini Zimbabwe Jumatano                

Emmerson Mnangagwa anatarajiwa kuapishwa kama rais wa Zimbabwe, kufuatia kuondoka kwa rais kuondoka kwa Robert Mugabe madarakani baada ya miaka 37 ya utawala wa kiimla.
Makamu huyo wa zamani wa rais ambaye alirejea kutoka uhamishoni Jumatano -ataapishwa kaka uwanja wa ndege wa Harare.
Kufutwa kwake kazi mwezi huu kulipelekea chama tawala cha Zanu-PF na jeshi kuingilia kati na kumlazimisha Mugabe ang'atuke .
Upinzani unamtaka Bwana Mnangagwa, ambae amekuwa mmoja wa watawala kumaliza "utamaduni wa ufisadi".
Taarifa ya kuondoka madarakani kwa Mugabe mwenye umri wa miaka 93 hapo siku ya Jumanne iliibua sherehe kubwa kote nchini Zimbabwe
Ilitolewa kwa njia ya barua bungeni na kikao cha kumpigia kura ya kutokuwa na imani nae kikakatizwa.
Katika barua hiyo Bwana Mugabe alisema anajiuzulu ili kuruhusu mchakato rahisi na wa amani wa ukabidhianaji mamlaka na kwamba uamuzi wake ulikuwa wa hiari.
Robert Mugabe na mkewe Grace tarehe 8 Novemba 2017                    Rais Mugabe alishutumiwa kwa kumuandaa mkewe Grace kuchukua wadhfa wa urais                
Bwana Mugabe na mkewe Grace hawajaonekana hadharani tangu Jumapili, na haifahamiki wako wapi .
Alhamis , taarifa zilielezea kuwa Bwana Mugabe amepewa kinga ya kutoshtakiwa.
Televisheni ya taifa imesema kuwa atahudhuria sherehe za kuapishwa kwa Bwana Munangagwa.
Sherehe hizo zitafanyika katika uwanja wa michezo mjini Harare wenye viti 60,000- huku waandalizi wakiwataka waZimbabwe kuhudhuria kwa wingi sherehe hizo.
Alhamisi Kiongozi wa chama kikuu cha upinzani nchini (MDC ) alitoa wito wa kufanyika kwa mageuzi makubwa ya kisiasa ili kuondoa masuala yaliyoweka madarakani kwa muda mrefu utawala wa Bwana.
Kiongozi wa upinzani Morgan Tsvangirai
                    Kiongozi wa chama cha upinzani cha Movement fo Democratic Change (MDC) Morgan Tsvangirai
Bwana Munangagwa alikimbilia nchini Afrika Kusini wiki mbili zilizopita- na kurejea nchini Jumatano wiki hii ambapo alipokelewa kama shujaa.
Bwana Mnangagwa aliahidi kubuni ajira ambapo baadhi wanakadiria kuwa 90% ya watu hawana ajira.
"Tunataka kukuza uchumi wetu, tunataka amani, tunataka kazi, kazi, kazi ," aliuambia umati wa watu uliomshangilia mjini Harare.
Jumatano chama tawala cha ZANU PF kilisema kitafanya mageuzi kuondoa sheria zilizomfanya Mugabe kuwepo madarakani kwa muda mrefu.

DR SHIKA AIBUKIA KWENYE MAHAFALI NA UZINDUZI WA CHUO CHA SAYANSI YA AFYA KAHAMA,AAHIDI BILIONI 2




Mkuu wa wilaya ya Kahama, Fadhili Nkurlu leo amezidua rasmi chuo cha Sayansi ya afya kilichopo Mjini Kahama mkoani Shinyanga ambapo uzinduzi huo umeambatana na mahafali ya kwanza ya wahitimu wa mafunzo hayo katika chuo hicho.

Uzinduzi huo umehudhuriwa na wageni mbalimbali kutoka ndani na nje ya wilaya ya Kahama akiwemo Mtanzania aliyejizolea umaarufu hivi karibuni Dr. Louis Shika ambaye ameahidi kutoa shilingi bilioni 2 kwa ajili ya kusomesha wanachuo ambao wazazi wao wameshindwa kuwalipia ada na wale ambao ni yatima wazazi wao wamefariki dunia.



Akizungumza katika hahafali hayo yaliyofanyika leo Alhamis Novemba 23,2017 Nkurlu aliwataka wahitimu wa fani mbalimbali wilayani Kahama kuwa waadilifu pale wanapopata nafasi ya kuihudumia jamii ili kukidhi matakwa ya kusomea fani hizo.
Nkurulu alisema baadhi ya wahitimu wa mafunzo mbali mbali wamekuwa wakishindwa kukidhi vigezo kutokana na kutokuwa na nia ya dhati ya kutekeleza wajibu wao kwa weledi na uadilifu.
Katika hatua nyingine Nkurlu alimwelezea Dr. Shika kuwa ni mtu wa pekee mwenye utulivu na usikivu na kuongeza kuwa wadau wengine waige kama alichofanya Dr. Shika katika kuinua elimu nchini.
Kivutio kikuu katika sherehe hizo akawa Dr. Louis Shika ambaye hivi karibuni amejingea umaarufu, alipojitokeza katika mnada wa nyumba za kifahari za Bilionea Saidi Lugumi zilizoko jijini Dar es salaam, kupitia msemo wake wa “(900 INAPENDEZA)” ambapo katika mahafali hayo ameahidi kutoa bilioni mbili kila mwaka kusomesha watoto yatima katika wilaya ya Kahama.
Dr. Shika alisema kuwa yeye ni mpenzi wa elimu na anapenda watu wote wapate elimu hivyo kupitia kampuni yake ya Lancefort atasaidia kusomesha wanachuo ambao wazazi wao wameshindwa kuwalipia ada na wale ambao ni yatima wazazi wao wamefariki.
Ahadi hiyo imekuja kufuatia risala ya chuo hicho iliyosomwa na Mkuu wa Chuo hicho na kuelezea changamoto wanazokutana nazo kuwa ni pamoja na wazazi kushindwa kulipa ada pamoja na waanachuo wengine kushindwa kuhitimu mafunzo yao baada ya wazazi wao kufariki.
Dr. Shika alitoa wito kwa ofisi ya mkuu wa wilaya imuombe kusaidia kusomesha wanafunzi wasio na uwezo kwani kampuni yake inauwezo wa kusaidia watoto yatima katika wilaya ya Kahama hivyo milango iko wazi na yeye yuko tayari kusaidia watu wenye njaa ya elimu.
Akielezea kiwango atakachokitoa kusomesha wanachuo hao, Dr Shika amesema kuwa itakuwa ni dola milioni moja za Kimarekani sawa na Bilioni mbili ambazo atakuwa anazitoa kila mwaka kwa chuo hicho kwa ajili ya kuwasaidia wanafunzi wanaopenda kusoma lakini wanashindwa kutokana na ukosefu wa ada.
Katika hatua nyingine Dr Shika aliwataka waandishi wa habari na mwenye chuo wasimuulize kuhusu msaada huo ndani ya wiki mbili kwani kwasasa hana pesa bali wasubiri mpaka mchakato wake wa kuhamisha fedha zake kutoka Urusi ukamilike.
Naye mkurugenzi wa chuo hicho Yonah Bakungile amesema kuwa kumekuwa na shida ya wanafunzi wanaomaliza vyuo vya uuguzi kutokuwa na maadili na kufikilia masirahi jambo ambalo limechangia kupoteza maana halisi ya masomo hayo.
Aliwataka kuitumikia jamii bila kuangalia maslahi na kuwahudumia watu walio nacho na wasiokuwa nacho ikiwa ni kutimiza malengo na nia ya kuanzisha vyuo vya uuguzi katika kuihudumia jamii katika maeneo mbali hapa nchini.
Aidha alisema baadhi ya Wahitimu wa vyuo vya uuguzi wanakosa uadilifu na kuweka mbele maslahi binafsi hulka inayopoteza maana halisi ya fani hiyo.
Amewataka kuitumikia jamii bila ubaguzi na kuangalia maslahi binafsi ili kwenda sanjari na matakwa na viapo vya kada ya uuguzi duniani.
Katika Mahafali hayo ya kwanza, Jumla ya Wahitimu 33 wametunukiwa cheti cha Msingi katika Kozi ya Mwaka mmoja ya Ufamasia.
Chuo cha Sayansi ya Afya Kahama kilianzishwa mwaka 2016 kikitoa mafunzo katika fani za Ufamasia na Utabibu na kwamba jumla ya wanachuo 33 wamehitimu.
ANGALIA PICHA ZA MATUKIO HAPA CHINI
Wahitimu wakiingia ukumbini katika mahafali ya kwanza ya chuo hicho.Picha zote kwa hisani ya Kijukuu blog
Wahitimu wa Chuo cha Sayansi ya Afya wakiingia ukumbini kwa furaha wakiwa na furaha tele.
Wahitimu wakiwa ukumbini
Mkuu wa wilaya akiwa na mkurugenzi wa Chuo hicho pamoja na mke wa mkurugenzi Mrs Bakungile.
Mwanachuo wa Chuo cha Sayansi ya Afya akionyesha burudani ya kucheza nyimbo za utamaduni wa Kisukuma katika mahafali hayo.
Mwanachuo akiendelea kutoa burudani katika uzinduzi wa chuo hicho.
Meza kuu ikifuatilia kwa makini burudani ya nyimbo za asili katika mahafali hayo.
Meza kuu ikifuatilia kwa makini burudani ya nyimbo za asili.
Familia na ndugu wa Mkurugenzi wa Chuo hicho wakiwa katika sherehe hizo wakifuatilia kwa makini hotuba ya mgeni rasmi
Mkurugenzi wa Chuo cha Sayansi ya Afya Ndugu Yonah Bakungile akitoa neno kwa wahitimu katika mahafali hayo
Wageni waalikwa pamoja na wazazi wakiwa katika sherehe za mahafali na uzinduzi wa chuo cha sayansi ya afya
Mwenyekiti wa bodi ya shule akimkaribisha mkuu wa wilaya ya Kahama kutoa hotuba yake.
Mkuu wa wilaya ya Kahama Fadhili Nkurlu akitoa hutuba kwa wazazi na wahitimu katika mahafali hayo.
Dr. Shika akitoa neno kwenye mahafali hayo
Dr. Shika akishikana mkono na Mkuu wa wilaya ya Kahama Fadhili Nkurlu
Dr. Shika akishikana mkono na mkurugenzi wa chuo hicho
Mgeni muhimu wa katika mahafali hayo Dr. Louis Shika akipeana mkono na wageni wa meza kuu baada ya kutoa neno lake
Kikundi cha sanaa kutoka hospitali ya wilaya ya Kahama wakitoa burudani katika uzinduzi huo wa chuo
Burudani inaendelea
Wahitimu wakiwa wameketi katika nafasi zao
Mwenyekiti wa mtaa wa Nyasubi Leonard Mayala kulia akiwa na Dr Louis Shika katika sherehe hizo
Mkuu wa wilaya ya Kahama Fadhili Nkurlu akikakugua maabara ya kufundishia kwa vitendo katika Chuo hicho.
Mkuu wa wilaya ya Kahama akiendelea kupata maelekezo kuhusu elimu ya vitendo wanayoipata wanachuo katika chuo hicho.
Msafara wa mkuu wa wilaya ukikagua chumba cha Computer katika chuo hicho.
Elimu bora ni pamoja na mazingira bora ya kusomea na kufundishia,Hili ni moja ya darasa katika chuo cha Sayansi ya afya Kahama.
Masomo kwa vitendo,Hili ni moja ya darasa la kufundishia likiwa na vifaa vya kisasa vya kufundishia katika chuo hicho.
Masomo kwa Vitendo hiki ni chumba maalumu cha kufundishia kikiwa na mfano wa wodi ambapo wanafunzi wanafundishwa kwa vitendo namna ya kuhudumia wagonjwa wakiwa chuoni hapo.
Moja ya darasa la kufundishia katika chuo cha Sayansi ya afya kilichozinduliwa leo mjini Kahama.
Baadhi ya wafanyabiashara wa mjini Kahama wakiwa katika sherehe hizo.
Mkuu wa wilaya ya Kahama akiendelea kutembelea vyumba katika chuo hicho
Wanachuo wa mwaka wa kwanza na wa pili wakiwa katika mahafali hayo
Wazazi wakiwa katika mahafali hayo
Picha zote kwa hisani ya Kijukuu blog